Ymgynghoriad Gardd

Mae bwrw ati i gynllunio’r ardd ddelfrydol yn gallu teimlo fel tasg anferthol ond gydag ychydig o help llaw wrth ystyried opsiynau a chynllunio, gall fod yn llawer o hwyl. Mae’n bosib nad oes angen dyluniad gardd lawn arnoch a’ch bod yn chwilio am ychydig o gyngor cyfeillgar.

Gwasanaethau ymgynghoriad gardd

Dewis 1: Ymweliad Safle neu sesiwn un-i-un yn ddigidol trwy ddefnyddio Zoom neu Teams a chyfle i drafod yr ardd, technegau cynllunio a chynlluniau plannu.

Os yn ymweliad safle byddaf yn cwrdd â chi ac yn ymweld â’ch gardd a holi cwestiynau er mwyn casglu’ch teimladau a’ch syniadau am eich gardd ddelfrydol. Byddaf yn gofyn ichi gwblhau holiadur gardd syml o flaen llaw. Bydd cyfle inni ystyried a gwerthuso’r opsiynau sydd ar gael ar gyfer eich gardd chi.

Os yn sesiwn Zoom/Teams byddaf yn gofyn cwestiynau i gasglu’ch syniadau a’ch teimladau am yr ardd. Fodd bynnag, bydd gofyn ichi fy nhywys o amgylch yr ardd yn ddigidol neu yrru fideo-daith o amgylch yr ardd o flaen llaw er mwyn dod i ddeall natur a lleoliad yr ardd. Bydd gofyn ichi gwblhau’r holiadur gardd syml o flaen llaw hefyd.

Dewis 2: Ymweliad Safle neu sesiwn un-i-un yn ddigidol gydag adroddiad ysgrifenedig.

Byddaf yn cwblhau’r ymweliad yn unol â’r hyn a nodir yn newis 1, ond yn ogystal â hynny yn darparu adroddiad ysgrifenedig yn seiliedig ar y drafodaeth. Bydd yr adroddiad yn cynnwys:

  • Disgrifiad o natur yr ardd
  • Amlinelliad o’r syniadau a drafodwyd a sut y gellir eu datblygu (yn cynnwys rhestrau planhigion, deunyddiau neu wrthrychau)
  • Rhestr ddarparwyr planhigion/deunyddiau crai
  • Cynllun Gweithredu gydag amserlen awgrymedig
  • Gwybodaeth am sut i ofalu am yr ardd a datblygu’ch sgiliau garddio ymhellach.

Gallwn deilwra’r opsiynau uchod yn unol â’ch dymuniadau chi. Cysylltwch am ddyfynbris a thrafodaeth bellach.

“Mae Adam wedi cynnal dau sesiwn ‘Zoom’ gyda ni fel Menter Caerdydd a Menter Bro Morgannwg dros y cyfnod clo. Mae wedi bod yn wych cael arbenigwr yn y maes i rannu ei gynghorion a’i driciau garddio. Mae pawb yn mwynhau ac mae ei sesiynau ‘Zoom’ yn gyfle gwych i ofyn cwestiynau, rhannu storiâu ac i dyfu’r gymuned arddio Cymraeg!”
Menter Caerdydd
“Mae Menter Iaith Sir Benfro wedi cael y pleser o gydweithio gydag ‘Adam yn yr Ardd’ ar sawl achlysur bellach ac mae pob sesiwn, nail ai wyneb yn wyneb neu glip fideo bob amser hwyliog ond eto yn llawn gwybodaeth ac yn broffesiynol. Mae Adam yn gyfathrebwr naturiol ac mae hyn wedi
dod i’r amlwg drwy’r sesiynau a drefnwyd gennym ac yn benodol felly gyda’r dysgwyr. Ymunodd Adam â ni yng Ngwyl y Dysgwyr 2019 ar y cyd â Dysgu Cymraeg Sir Benfro, ac eleni, oherwydd y cyfyngiadau presennol, trefnwyd gwyl rithiol ac un o’r sesiynau mwyaf poblogaidd ac a ddenodd y mwyaf o ymateb oedd ‘Adam yn yr Ardd’. Mae brwdfrydedd Adam, ynghyd â’i wybodaeth helaeth yn y maes yn ryfeddol – cewch chi ddim m’och siomi!”
Menter Sir Benfro
“Mae wedi bod yn bleser gweithio gydag Adam i greu fideos addysgiadol ar ran prosiect Tyfu’r Dyfodol a’r Ardd Fotaneg Genedlaethol.  Mae ei brwdfrydedd a dealltwriaeth am arddio a’r Gymraeg yn hynod werthfawr.  Mae’r fideos mae Adam wedi cynhyrchu ar ein cyfer wedi bod yn boblogaidd iawn ac wedi ein galluogi i ddarparu hyfforddiant dros y we.  Mae ansawdd y fideos o ran cynnwys a gwybodaeth, cyflwyno, ffilmio a golygu wedi bod yn ardderchog pob tro.”
Prosiect Tyfu’r Dyfodol, Gardd Fotaneg Genedlaethol Cymru
“Mae sgwrsio gydag Adam ar y Sioe Frecwast ar Radio Cymru 2 bob amser yn bles i fi a Daf. Mae’i frwdrydedd a’i wybodaeth yn ddi-ddiwedd ac mae’n trosglwyddo ffeithiau a thips yn glir ac yn llawn hiwmor – hyd yn oed i gyw-arddwr fel fi ac un sy’ BYTH yn garddio fel Daf. Mae o wedi dysgu cymaint i ni ac mae unrhyw un sy’n gallu ennyn diddordeb a chyffro yn genhadwr ardderchog dros y grefft…does neb i guro Adam.”
Caryl Parry Jones, Sioe Frecwast – BBC Radio Cymru 2

Am wybod mwy?

Cysylltwch